1Ti 6 | GAM | STEP | Pillgi pai una nu kogo yenj ge, yenekne kantau yenj una kerman kambono pille pla ye awo, menameto moye. Embe yei dal, una God kandjiye dje ke naye, kandja beke aunmon ge, dje ke nayene.

1 Timothy 6

Una nu kogo yenj una singare yene mal

1 Pillgi pai una nu kogo yenj ge, yenekne kantau yenj una kerman kambono pille pla ye awo, menameto moye. Embe yei dal, una God kandjiye dje ke naye, kandja beke aunmon ge, dje ke nayene. 2 Ga kantau yenj una kerman mor ge pillgi djine ba nu kogo una ge na agana moro pille yene kandjiye to worno we dje napiya. Ge pillgi pai una para moro, na une wopake kando we dje kanda. Una kerman kogoye panda ge une wopake ye awo, amblo pille dje aunda.

Una ku pille pla yene ge ale paro

Timoti, kandja embe pai ge, ni embe yeme dje beke aumbenka piye. 3 Nono Iwa Kerman Jisas Krais nono God singare wopake paro mal beke aundo pirmon. Ba alla una ta Jisas kandjiye du dje paro mal man dje awo kandja djell ta beke awi dal, 4 iwa ge, na iwa pla moro dje kando, kandja napille, wal pillpol natondo iwa. Une kandja iko mugo, nonga to, na kandja djindo mal panda dje pille pla yendo. Embe yendaka una kumbene ke yendaka, kandjine abiyeke, una nomane ke ine. 5 Ga nomane ke paro una mor ge, una boll kumbene ke yendaka, kandja kaima ge, ga boll nayero. Ga nomane embe paro, na God kogoye yeno al ge, wal merke kane nano we djinj.

6 Embe djinj ba nono God kogoye ye molo, na wal kembis yenda mo kerman yenda ge na boll pora yero dje kanbon. Ta kani dal, nono nomane pakna wal merke kane nambon. 7 Ge nono mane kui makimb al wopin poke ge, nono wal ta naiwpin. Alla, gopon poke ge, nono kiwa er yem bon. 8 Ge pille, nono kwa mokna yenda mo kon konom yenda ge, nono boll pora yero dje pille ke napupon. 9 Ba alla una wal merke kane nambon dje pir una moye ge, yage kal tane. Satan kuwo kolo to, nomane ye ke yei. Wal i nambon dje pille pla yene wal ge ye molo ngundjo i kal wordaka ga ke mal ye moye. 10 Una ku merke kane nambon dje pir una ge singare ke merke pla wonda. Una pende kond embe wani al ge, yenekne pillgi dji ge kere imb kerman kaki.

Pol Timoti kandja kindine dje aundo

11 Ba ni God wombaye moren. Wal ke embe paro ge ni kere seke ben. Ni singare du dje ye molo, God singare paro mal pille karkar ye, pillgi dje, una kane wopake kane, imb kake pa molo, una boll singare kiye dje ye molo wanben. 12 Ni pillgi djinden al ge ni kunda yembe yemben. God ni gun molo pamben dje yau toi mal ge, ni una merke moi al kandja ge dje pene worin pi. Alla ni gun molo paren mal ge amblo gi djimben. 13 God ye wori wal porapora gun moro iwa ge na une nale al kandja dje ni aundo. Alla Krais Jisas Pontus Pailat moi al aglo gi dje molo kandja dje pene wori iwa ge na para Krais nale al kandja dje ni aundo. 14 Ni wambo napandaka, djengimb namoyaka, God kandja dje wori pai ge ni embe ye molo benka, are nono Iwa Kerman Jisas Krais er pene wonda kanbon. 15 God djinda poke ge dje wordaka Krais er pene wonda. God ge, wopake moi mal molo, una kantau yendo una taimane moro. Una king porapora mor ge une kingne plato moro, una kerman porapora mor ge une iwa kerman plato moro. 16 Une taimane ge ege ege molo paro, pora nadjinda iwa. Une moro al ge au kerman djindaka nono manda bon kune nayendo, une nakaninj, alla kanne naparo, yene kandjiye kerman plato pundaka, yembeye dongall ege ege pandaka, molo pa moyambe. Kaima.

God unakye wal merke kane nonj una singare wopake yene

17 Una makimb al wal kerman kane nonj una na iwa pla moro dje ye nawanne. Wal ge ola dje pora djinda, ga nomane al wal ge napanda, God boll panda. Une moro ge nono wopake pupon dje wal porapora aundo iwa moro. 18 Wal merke kane nonj una moye al ni djimbenka singare wopake yene. Wal merke kane nane ge embe mal yene, singare wopake ege merke ye una aune. Una boll kollkamang no, wal una aumbon dje pille moye. 19 Ga embe yei dal, wal wopake kaninj wal i makai tane, numb tuminj dongall mal to worne pandaka, are ege ta wonda ge kambono gun kaima molo pane me ge, amblo gi djine.

Timoti kogo yendo ge kantau wopake yenda

20 Timoti, God ni kogo awi ge ni kantau wopake yemben. Una ni kandja djin napir una ge God nomane pai mal kandja nadji, kandja aulaul dji. Ga no nomane wopake pai djinmon ye piye we dji ba ale pai. Ga nomane paro ge ye molo God kandjiye boll kunda ye aundo, ni ellke mopen. 21 Una nomane ke pai kandja dji ge una pende pille karkar ye po pillgine ge keri.

God wandill goi me ge ye boll moya. God ye wopake pille aunda moye.